काठमाडौं । चीनले प्रविधिको प्रयोगलाई विस्तार गर्दै सडकमा रोबोट ट्राफिक प्रहरी तैनाथ गर्न थालेको छ। एआईमोगा (AiMOGA) रोबोटिक्सले चीनको वुहु सहरमा आफ्नो पहिलो बुद्धिमान ट्राफिक प्रहरी रोबोट ‘इन्टेलिजेन्ट पुलिस युनिट आर–००१’ सार्वजनिक स्थलमा तैनाथ गरेको हो।
झोङ्गजियाङ्ग एभेन्यू र चिझु माउन्टेन रोडको चौबाटोमा राखिएको उक्त रोबोटले मानवीय ह्याण्ड सिग्नलमार्फत ट्राफिक निर्देशन दिन्छ। मानव ट्राफिक प्रहरीसँग सहकार्य गर्दै यसले ट्राफिक प्रवाह व्यवस्थापन तथा सडक प्रयोगकर्तालाई सचेत गराउने काम गर्छ।
रोबोट सहरको ट्राफिक सिग्नल प्रणालीसँग जोडिएको छ र अनियमित गतिविधि पहिचान गरी शान्त तरिकाले चेतावनी दिन सक्षम छ। कम्पनीका अनुसार, यसले दोहोरिने ट्राफिक निर्देशनको जिम्मेवारी सम्हाल्दा मानव प्रहरीलाई जटिल अवस्थामा केन्द्रित हुन सहज बनाएको छ।
एआईमोगा हाल ३० भन्दा बढी देशमा सञ्चालनमा रहेको छ र यस वर्ष ईयू प्रमाणीकरणसहित श्रृंखला ‘ए’ लगानी राउन्ड पनि सम्पन्न गरेको छ।