काठमाडौं । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले फागुन ४ गतेदेखि १८ गतेसम्म निर्वाचन प्रचारको समय भएको बताएका छन् । मंगलबार आयोगमा आयोजित पत्रकार सम्मेलनमा उनले निर्वाचन आचारसंहिता पालना गर्न आग्रह गरेका हुन ।
“फागुन ४ गतेदेखि १८ गतेसम्म निर्वाचन प्रचारप्रसारको समय तोकेका छौँ । मनोनयनपत्र दाखिल गरेपछि बीचमा चुपो लागेर बस्ने हो रु भन्ने लाग्न सक्छ । त्यो, होइन,” उनले भने ।
निर्वाचन चिह्न प्राप्त भएपछि घरदैलोमा मतदाता भेट्न सक्ने, रायसुझाव लिन सक्ने उनले बताए । “तर, दलगत रूपमा उमेदवारहरूले ठूलो आमसभा, गोष्ठि, सेमिनारलगायतका विषयवस्तु गर्न पाइँदैन,” उनले भने ।
मौन अवधिमा पनि प्रचारप्रसारमा लागे आचारसंहिता मिचेकोमा कारबाही गर्नुपर्ने उनले बताए । मनोनयनपत्र दर्ता गर्न जाँदा आचारसंहिता उलंघन गरेको भए जाँचबुझ गरेर निर्णय लिने उनको भनाइ छ ।
“आचारसंहिता लागु भएको छ । मनोनयनपत्र दाखिल गर्न यसरी जानुपर्छ भनेर आह्वान गरेका थियौँ । आचारसंहिता उलंघन भएको उजुरी आएमा छानबिन गर्ने, निर्णय लिने आयोगको क्षेत्राधिकारभित्र पर्छ,” भण्डारीले भने ।
प्रदेशसभा र स्थानीय तहका प्रतिनिधि पनि प्रतिनिधिसभाको उमेदवार बनेकाले रिक्त स्थानमा फागुन २१ पछि निर्वाचन गरिने बताए । “स्थानीय तहको ६ महिनाबढी बाँकी भएकाले पूर्ति गर्नैपर्ने कानुनी व्यवस्था छ । त्यसैले उनले फागुन २१ को निर्वाचनपछि निर्वाचन गरी पूर्ति गर्छौं,” उनले भने ।