काठमाडौं । नेपाली कांग्रेसले प्रतिनिधिसभामा समानुपातिकतर्फबाट निर्वाचित हुने २० जनाको नाम टुंगो लगाएको छ । आइतबार (चैत १) सानेपामा बसेको केन्द्रीय कार्यसम्पादन समितिको बैठकबाट १५ महिला रहने गरी २० जनाको नाम चयन गरिएको कांग्रेसका प्रवक्ता देवराज घिमिरेले जानकारी दिए ।
राष्ट्रियसभा र प्रतिनिधिसभामा कांग्रेसका ६२ सदस्य रहने भन्दै उनले दुवै सदनको कम्तीमा एकतिहाइ अर्थात् २१ महिला रहने गरी निर्वाचन आयोगमा नामावली सिफारिस गरिने बताए ।
“हाम्रो राष्ट्रियसभा र प्रतिनिधिसभामा रहने सांसदको संख्या ६२ सिट भएको छ । त्यसमा २१ सिटमा महिला अनिवार्य छ । अहिले २० जनाको प्रतिनिधित्वका लागि १५ जना महिला अनिवार्य छ,” उनले भने, “आदिवासी जनजाति र खसआर्यबाट ६/६, मधेसीबाट र दलितबाट तीन/तीन, मुस्लिम र थारूबाट एक/एक गरी २० जनाको नाम सिफारिस गर्छौं । यसमा १५ जना अनिवार्य महिला छ । यसमा हामीले निर्णय गरिसकेका छौँ ।”
आयोगले क्लस्टरमा तोकिएको मापदण्डअनुसार नामावली नमिलेको जानकारी गराएमा सच्याइने उनले बताए । “यो बन्दसूची बुझाउने पनि निर्वाचनकै प्रक्रिया हो, त्यहाँ केही क्लस्टरमा सच्याउन मिल्छ,” चालिसेले भने, “हामी निर्वाचन आयोगमा अहिले जान्छौँ । भोलि आयोगले नै नाम प्रकाशित गर्छ ।”
आयोगले यो विवरण रुजु गरेर ठिक भए सांसद निर्वाचित गरी प्रमाणपत्र दिनेछ । समानुपातिकतर्फ निर्वाचित हुने सांसदको सूची बुझाउन दलहरूलाई आयोगले आजसम्मको समय दिएको छ । दलहरूले यसअघि आयोगमा बुझाएको सामानुपातिक उमेदवारको बन्दसूचीबाट निर्वाचित हुनेको नाम सिफारिस गर्नुपर्ने व्यवस्था छ ।