काठमाडौं । नेपाली कांग्रेसले जाँचबुझ आयोगको प्रतिवेदन सार्वजनिक गर्न ढिलाइ भइरहेको भन्दै सरकारमाथि प्रश्न उठाएको छ।
प्रतिनिधिसभाको बैठकमा कांग्रेस सांसदहरूले सरकार पारदर्शिताबाट टाढा जान खोजेको आरोप लगाउँदै आयोगको प्रतिवेदन लुकाउने प्रयास भइरहेको संकेत गरेका छन्। उनीहरूले भदौ २३ र २४ का घटनाबारे सत्यतथ्य जनतासामु ल्याउन ढिलाइ हुनु गम्भीर विषय भएको बताएका छन्।
कांग्रेसले प्रधानमन्त्री बालेन्द्र शाह सँग प्रतिवेदन सार्वजनिक गर्ने स्पष्ट समयसीमा माग गरेको छ। “जनताले सत्य जान्न पाउनुपर्छ, प्रतिवेदन लुकाएर जिम्मेवारीबाट उम्किन पाइँदैन,” कांग्रेस सांसदहरूको भनाइ थियो।
संसद्मा उठेको यस विषयले सरकार र प्रमुख प्रतिपक्षबीचको दूरी थप बढ्ने संकेत देखिएको छ। कांग्रेसले दोषीलाई कारबाही र निर्दोषलाई न्याय दिन ढिलाइ भए कडा आन्दोलनमा उत्रिने चेतावनी समेत दिएको छ।
यससँगै संसद्मा फेरि एकपटक जवाफदेहिता र पारदर्शिताको मुद्दा केन्द्रमा आएको छ, जसले आगामी राजनीतिक बहसलाई थप तातो बनाउने देखिन्छ।