काठमाडौं— देशभरका विद्यालयमा आजदेखि नयाँ शैक्षिक सत्र २०८३ औपचारिक रूपमा सुरु भएको छ। सरकारको निर्णयअनुसार यस वर्षदेखि शैक्षिक सत्र वैशाख १५ गतेबाट सुरु गरिएको हो।
यसअघि वैशाख २ गतेदेखि सुरु हुँदै आएको शैक्षिक सत्रलाई सार्नुको मुख्य कारण निजी विद्यालयहरूले वार्षिक परीक्षा सकिनुअघि नै भर्ना खुलाउने प्रवृत्ति नियन्त्रण गर्नु र इन्धन आपूर्तिमा देखिएको असहज अवस्थालाई व्यवस्थापन गर्नु रहेको बताइएको छ।
शिक्षा, विज्ञान तथा प्रविधि मन्त्रालयले कानुनविपरीत असुल गरिएको भर्ना तथा अन्य शुल्क फिर्ता गराउन स्थानीय तहहरूलाई निर्देशन दिइसकेको छ। मन्त्रालयका अनुसार संस्थागत विद्यालय शुल्क निर्धारण मापदण्ड निर्देशिका, २०७२ भन्दा बाहिर गएर लिइएका सबै शुल्क फिर्ता गरिनुपर्नेछ।
यसैबीच, सर्वोच्च अदालतले पनि परीक्षा नतिजा प्रकाशित नभई तथा आवश्यक प्रमाणपत्र नपुगी भर्ना प्रक्रिया अघि नबढाउन अन्तरिम आदेश दिएको छ। न्यायाधीश बालकृष्ण ढकालको इजलासले शिक्षा नियमावली, २०५९ अनुसार शैक्षिक सत्र सुरु भएपछि मात्रै भर्ना प्रक्रिया सञ्चालन गर्नुपर्ने स्पष्ट पारेको छ।
यद्यपि, केही स्थानीय तहको सहजीकरणमा वैशाख १५ अघि नै विद्यार्थी भर्ना भइसकेका घटनाहरू पनि सार्वजनिक भएका छन्।
सरकारले अब परीक्षा नतिजा, प्रमाणपत्र र भर्ना प्रक्रियाबीच समन्वय कायम गर्दै शैक्षिक प्रणालीलाई व्यवस्थित बनाउने लक्ष्य लिएको जनाएको छ।