काठमाडौँ । हुम्लाको चङ्खेली गाउँपालिका–५ अन्तर्गतको नेप्का गाउँमा गएराति भीषण असिनापानी र हावाहुरीपछि खसेको पहिरोले डाँफेस्थित आधारभूत विद्यालयको भवनमा गम्भीर क्षति पुर्याएको छ। पहिरोसँगै आएको लेदो बाढीले विद्यालय भवनका साथै खेतीयोग्य जग्गा र बस्तीका गोठहरू समेत पुरेको स्थानीय बासिन्दा छक्कबहादुर तामाङले जानकारी दिएका छन।
चङ्खेली–५ का वडाध्यक्ष हर्कधन तामाङ र स्थानीय धनसिंह तामाङका गोठ पनि पहिरोले पुरेको छ। त्यहाँ रहेका भेडाबाख्रामा ठूलो क्षति पुगेको बताइएको छ। भिरालो नाङ्गो पाखोबाट लेदोसहितको बाढी सोझै बस्तीभित्र पसेको र भौगोलिक विकटताका कारण उद्धार कार्यमा ढिलाइ भइरहेको छ।
डिएसपी विष्णु श्रेष्ठ, जिल्ला प्रहरी कार्यालय हुम्ला का अनुसार सुरक्षाकर्मी घटनास्थलमा पुगेपछि मात्रै क्षतिको यकिन विवरण आउनेछ — अहिलेसम्म मानवीय क्षतिको विवरण आइसकेको छैन।
जिल्ला प्रहरी कार्यालय हुम्लाका प्रमुख प्रहरी नायब उपरीक्षक शङ्कर खड्काका अनुसार प्रहरी टोली घटनास्थलतिर प्रस्थान गरिसकेको छ। तथापि नजिकको प्रहरी चौकीबाट समेत पैदल सात घण्टाको यात्रा लाग्ने हुँदा सुरक्षाकर्मी अझै पुग्न सकेका छैनन्। घटनाको थप विवरण आउन बाँकी रहेको उनले बताए।
