काठमाडौँ । एसियाली खेलकुदमा आफ्नो स्थान सुरक्षित गर्ने लक्ष्यका साथ नेपाली पुरुष क्रिकेट टोलीले आज आफ्नो पहिलो परीक्षा दिँदैछ।
सिंगापुरमा आयोजना भइरहेको एसियाली खेलकुद छनोट प्रतियोगिता अन्तर्गत समूह चरणको पहिलो खेलमा नेपालले आज चीनको सामना गर्न लागेको हो।
नेपाली समय अनुसार यो प्रतिक्षित खेल बिहान ७:१५ बजे सुरु हुँदैछ।
छनोट समीकरण र नेपालको लक्ष्य
प्रतियोगितामा सहभागी टोलीहरूलाई दुई समूहमा विभाजन गरिएको छ। नेपाल रहेको समूह ‘ए’ मा चीन र मलेसिया रहेका छन् (कतारले अन्तिम समयमा नाम फिर्ता लिएको थियो)।
नियम: दुवै समूहका शीर्ष २–२ टोलीहरू आगामी एसियाली खेलकुदका लागि छनोट हुनेछन्।
दुई दिनको सघन अभ्यासपछि मैदान उत्रिन लागेको नेपाली टोलीको मुख्य लक्ष्य समूह विजेता बन्दै सानदार रूपमा छनोट हुनु हो।
दीपेन्द्रको काँधमा कप्तानी, बलियो टोली घोषणा
नेपाल क्रिकेट संघ (क्यान) ले स्टार अलराउन्डर दीपेन्द्रसिंह ऐरीको कप्तानीमा बलियो र सन्तुलित टोली मैदानमा उतारेको छ। टोलीमा अनुभवी तथा युवा खेलाडीहरूको उत्कृष्ट मिश्रण रहेको छ।
नेपाली टोलीका प्रमुख खेलाडीहरू:
कप्तान: दीपेन्द्रसिंह ऐरी
ब्याटिङ/अलराउन्ड: कुशल भुर्तेल, आसिफ शेख, रोहित पौडेल, कुशल मल्ल, सन्दीप जोरा, लोकेश बम, आरिफ शेख, भीम सार्की।
बलिङ आक्रमण: सन्दीप लामिछाने, सोमपाल कामी, करण केसी, शाहब आलम।
खेलको मुख्य आकर्षण: केही समय अघि मात्र उत्कृष्ट फर्ममा देखिएका दीपेन्द्रसिंह ऐरीको नेतृत्व र स्पिन जादुगर सन्दीप लामिछानेसँगै सोमपाल-करणको पेस जोडीले नेपाली टोलीलाई बलियो दाबेदार बनाएको छ। चीनविरुद्धको आजको खेलमा नेपाल सहज जित निकाल्दै प्रतियोगितामा सुखद सुरुवात गर्ने रणनीतिका साथ मैदान उत्रनेछ।