काठमाडौं – नेपाली कम्युनिस्ट पार्टी (नेकपा) का संयोजक Pushpa Kamal Dahal ले देशको वर्तमान राजनीतिक परिस्थितिलाई मध्यनजर गर्दै कम्युनिस्ट शक्तिहरूबीच यथाशीघ्र सहकार्य र एकताको प्रक्रिया अघि बढाउनुपर्ने बताएका छन्।
‘नेपालको कम्युनिस्ट आन्दोलन र जननेता मदन भण्डारी’ विषयक विचार गोष्ठीलाई सम्बोधन गर्दै उनले पार्टी एकता तत्काल सम्भव नभए पनि कार्यगत सहकार्य भने ढिलाइ नगरी सुरु गर्नुपर्ने धारणा राखे। उनका अनुसार विचार मिल्ने कम्युनिस्ट शक्तिहरूले साझा उद्देश्यका लागि आजैदेखि सहकार्य गर्न सके मात्रै आन्दोलनलाई बलियो बनाउन सकिन्छ।
प्रचण्डले केही नेताहरूले पार्टी एकताको विषयलाई गलत ढंगले बुझेको टिप्पणी गर्दै, एकता समय लागे पनि सहकार्यका लागि कुनै बहाना नबनाउन आग्रह गरे। “आज सम्भव छ भने आजै, भरे सम्भव छ भने भरे र भोलि सम्भव छ भने भोलि नै सहकार्य सुरु गर्नुपर्छ,” उनले भने।
उनले वर्तमान सरकारले संविधानका आधारभूत मूल्य–मान्यता र उत्पीडित समुदायका अधिकारमाथि प्रहार गरिरहेको आरोप लगाउँदै त्यसको प्रतिरोधका लागि कम्युनिस्ट शक्तिको साझा मोर्चा आवश्यक भएको बताए। संविधान र लोकतान्त्रिक उपलब्धिको रक्षा गर्न वामपन्थी एकता अपरिहार्य रहेको उनको भनाइ थियो।
विश्वभर कम्युनिस्ट आन्दोलनमाथि दबाब बढिरहेको उल्लेख गर्दै प्रचण्डले नेपालमा पनि कम्युनिस्ट शक्तिलाई कमजोर बनाउने प्रयास भइरहेको दाबी गरे। उनले विगतका केही राजनीतिक आन्दोलन र निर्वाचनलाई समेत कम्युनिस्ट आन्दोलनलाई कमजोर पार्ने योजनासँग जोडेर व्याख्या गरे।
राष्ट्रिय स्वाधीनताको रक्षा, निरंकुश प्रवृत्तिको अन्त्य तथा बाह्य हस्तक्षेपविरुद्ध सबै देशभक्त कम्युनिस्ट शक्तिहरू एकजुट हुनुपर्नेमा जोड दिँदै उनले एकता र सहकार्यमा अनावश्यक ढिलाइ भए त्यसको असर देशले नै भोग्नुपर्ने चेतावनी दिए।
प्रचण्डले जननेता मदन भण्डरी प्रति सच्चा सम्मान व्यक्त गर्ने सबैभन्दा प्रभावकारी माध्यम कम्युनिस्ट शक्तिहरूबीचको एकता र सहकार्य भएको उल्लेख गर्दै प्राप्त राजनीतिक उपलब्धिको संरक्षणका लागि सबै वामपन्थी घटक एकताबद्ध भएर अघि बढ्नुपर्ने आवश्यकता औँल्याए।