काठमाडौँ। भोटेकोशी-त्रिशूली बाढीपछि राहतमा वितरण हुने खाद्य सामग्रीको गुणस्तर र स्वच्छता सुनिश्चित गर्नुपर्ने जिम्मेवारी बढिरहेका बेला खाद्य प्रविधि तथा गुण नियन्त्रण विभागका निमित्त महानिर्देशक सोमकान्त रिजाल श्रीलंकामा आयोजित खाद्य प्रणालीसम्बन्धी क्षेत्रीय कार्यशालामा सहभागी भएका छन्।
विभागले भदौ १३ गते बाढीपीडितका लागि उपलब्ध गराइने खाद्य पदार्थको निरीक्षण तथा अनुगमन गरी त्यससम्बन्धी विवरण सार्वजनिक गरेको थियो। त्यसको दुई दिनपछि अर्थात् अगस्ट ३१ देखि सेप्टेम्बर १ सम्म श्रीलंकाको कोलम्बोमा आयोजित ‘सासेक नलेज वर्कसप अन फुड सिस्टम्स’ मा सहभागी हुन निमित्त महानिर्देशक रिजाल श्रीलंका गएको खुलेको हो।
स्वास्थ्य तथा खाद्य स्वच्छता मन्त्रालयका सचिव डा. विकास देवकोटाले रिजालको वैदेशिक भ्रमण स्वीकृत भएको पुष्टि गरेका छन्। मन्त्रालयका अनुसार उनको श्रीलंका भ्रमण केही दिनअघि मात्रै स्वीकृत भएको हो। भ्रमणसम्बन्धी थप विवरण कार्यालय समयमा उपलब्ध गराउन सकिने मन्त्रालयले प्रशासनलाई जनाएको छ।
दक्षिण एसिया उपक्षेत्रीय आर्थिक सहयोग (सासेक)को कार्यक्रम विवरणअनुसार कार्यशाला खाद्य प्रणाली विकासमा क्षेत्रीय सहकार्य अघि बढाउने र आगामी वर्षका प्राथमिक पहल पहिचान गर्ने उद्देश्यले आयोजना गरिएको हो। यसमा सासेक खाद्य प्रणाली विकास रूपरेखा २०३५, सन् २०२५ को ज्ञान कार्यशालाका प्रमुख उपलब्धि, सासेक पहलसम्बन्धी कार्ययोजना २०२६-२०२८ तथा क्षेत्रीय समन्वय र कार्यान्वयन संयन्त्रलगायत विषय कार्यसूचीमा छन्।
कार्यक्रममा सासेक सदस्य मुलुकका कृषि तथा बागवानी, पशुपालन, मत्स्य, खाद्य सुरक्षा र खाद्य व्यापार हेर्ने सरकारी निकायका प्रतिनिधिसँगै एसियाली विकास बैंकका कर्मचारी, परामर्शदाता तथा अनुसन्धान र प्राज्ञिक क्षेत्रका विज्ञ सहभागी हुने उल्लेख छ।
मुलुक ठूलो विपद्को सामना गरिरहेको र सरकारका मन्त्रीदेखि सुरक्षा निकायसम्म खोज, उद्धार तथा राहतमा केन्द्रित भइरहेका बेला बाढी प्रभावितका लागि वितरण तथा भण्डारण गरिने खाद्य पदार्थको गुणस्तर र स्वच्छता सुनिश्चित गर्ने जिम्मेवारी बोकेको विभागका प्रमुखको विदेश भ्रमणलाई लिएर विभागीय प्राथमिकतामाथि प्रश्न उठेको हो।
विपद्का बेला नेतृत्व विदेशमा, प्राथमिकतामाथि प्रश्न
कार्यशाला विभागको कार्यक्षेत्रसँग सम्बन्धित भए पनि मुलुकले ठूलो विपद् सामना गरिरहेको समयमा खाद्य सुरक्षाजस्तो संवेदनशील जिम्मेवारी बोकेको निकायको कार्यकारी नेतृत्व विदेश भ्रमणमा जानुलाई लिएर विभाग तथा मन्त्रालयभित्रै प्रश्न उठेको छ।
विभाग आफैँ स्थायी महानिर्देशकको सट्टा निमित्त नेतृत्वमा चलिरहेको छ। त्यसमाथि बाढीपछि प्रभावित क्षेत्रमा राहत सामग्रीको खाद्य स्वच्छता तथा गुणस्तर सुनिश्चित गर्नुपर्ने असाधारण अवस्था रहेका बेला कार्यकारी नेतृत्वसमेत विदेशमा रहनुले विभागको तत्कालीन प्राथमिकतामाथि प्रश्न खडा गरेको हो।