काठमाडौं । चिनियाँ राष्ट्रपति सी जिनपिङको ब्रिक्स शिखर सम्मेलनमा सहभागिताले ब्रिक्स सहकार्यलाई उच्च गुणस्तरीय रूपमा अघि बढाउन रणनीतिक रूपमा महत्वपूर्ण रहेको बताइएको छ ।
शनिबार र आइतबार भारतमा भएको १८औँ ब्रिक्स शिखर सम्मेलनमा सीको सहभागिताबारे पत्रकारहरूलाई जानकारी दिँदै चिनियाँ विदेशमन्त्री वाङ यीले यस्तो बताएका हुन् ।
चिनियाँ कम्युनिस्ट पार्टीको केन्द्रीय समितिको राजनीतिक ब्युरोका सदस्यसमेत रहेका वाङले सीको दक्षिण एसिया भ्रमणले ग्लोबल साउथका देशबीच एकताबाट शक्ति निर्माण गर्ने वातावरणसमेत बलियो बनाएको बताए ।
वाङका अनुसार सीको भ्रमणले मुख्यतः तीन क्षेत्रमा महत्वपूर्ण प्रभाव पारेको छ ।
पहिलोः ब्रिक्स सहकार्यमा नयाँ गति थपियो
सीले पछिल्ला दुई दशकमा ब्रिक्सको विकासलाई ‘आत्मनिर्भरता र आत्मसुदृढीकरण’, ‘आँधीबेहरीबीच एकजुट भएर अघि बढ्नु’ र ‘फलदायी उपलब्धि’ गरी तीन मुख्य वाक्यांशमा समेटेको वाङले बताए ।
नयाँ ऐतिहासिक चरणमा प्रवेश गरेको ब्रिक्सलाई नवप्रवर्तनमा आधारित विकास, शान्ति तथा स्थिरता कायम गर्ने, सभ्यताबीच पारस्परिक सिकाइ प्रवर्द्धन गर्ने तथा विश्वव्यापी शासन प्रणालीमा सुधार ल्याउने दिशामा अग्रसर हुन सीले आह्वान गरेको उनले बताए ।
सन् २०२७ मा ब्रिक्सको चौथो ‘चीन वर्ष’ मनाइने उल्लेख गर्दै सीले यस अवसरलाई सबै पक्षसँग सहमति निर्माण, भविष्यका सम्भावना विस्तार र ब्रिक्स सहकार्यको तेस्रो ‘स्वर्णिम दशक’ सुरु गर्न प्रयोग गर्ने घोषणा गरेको वाङले बताए ।
दोस्रोः भ्रमणले ग्लोबल साउथलाई थप सशक्त बनायो
सीले ग्लोबल साउथलाई बलियो बनाउन चार महत्वपूर्ण प्रस्ताव अघि सारेको वाङले बताए ।
उनका अनुसार अन्तर्राष्ट्रिय मामिलामा कानुनको शासनको संयुक्त रूपमा रक्षा गर्ने, अन्तर्राष्ट्रिय कानुन तथा नियम सबैका लागि समान रूपमा लागू हुने सुनिश्चित गर्ने, बहुपक्षीयताको पक्षमा उभिँदै संयुक्त राष्ट्रसंघको भूमिका र अधिकारलाई कायम राख्ने, जनकेन्द्रित विकासलाई प्राथमिकता दिँदै सन् २०३० को दिगो विकास एजेन्डा कार्यान्वयन गर्ने तथा परम्परागत र गैरपरम्परागत दुवै सुरक्षा चुनौती सामना गर्न संयुक्त रूपमा सुरक्षा शासन अघि बढाउने प्रस्ताव सीले गरेका छन् ।
वैज्ञानिक तथा प्राविधिक क्रान्ति र औद्योगिक रूपान्तरणको नयाँ चरणलाई ध्यानमा राख्दै सीले एआईबाट सशक्त नयाँ औद्योगिकीकरण, खुला स्रोत तथा समावेशी एआई, डिजिटल उद्योग सहकार्य र स्मार्ट उत्पादन सहकार्यसम्बन्धी पहलहरू अघि सारेको वाङले बताए ।
तेस्रोः भ्रमणले चीन–भारत सम्बन्धलाई नयाँ दिशा दियो
सी र भारतीय प्रधानमन्त्री नरेन्द्र मोदीबीच चीन–भारत सम्बन्धसँग जोडिएका रणनीतिक, दीर्घकालीन तथा दिशानिर्देशक विषयमा स्पष्ट र गहन छलफल भएको वाङले बताए ।
दुवै नेताबीच बनेको सबैभन्दा महत्वपूर्ण सहमति चीन र भारत साझेदार बन्नुपर्ने रहेको उनले बताए ।
चीन र भारतले एकअर्काको सबल पक्षबाट सिक्दै, एकअर्कालाई सहयोग गर्दै र साझा विकास अघि बढाउन सक्ने सीले बताएको वाङको भनाइ छ ।
दुवै देशका नेताले सीमावर्ती क्षेत्रमा शान्ति र स्थिरता कायम राख्न संयुक्त रूपमा काम गर्ने सहमति गरेको तथा ब्रिक्सको अध्यक्षता सम्हाल्दा दुवै देशले एकअर्कालाई सहयोग गर्ने सहमति भएको पनि वाङले बताए ।