नेप्सेमा २५.५५ अंक बढ्दा साढे ४ अर्बको कारोबार, यी हुन् धेरै कमाउने पाँच कम्पनी

काठमाडौँ — सेयर कारोबार मापक नेप्से परिसूचक सोमबार २५.५५ अंकले बढेको छ । गत शुक्रबार करिब २८ अंकले बढेको नेप्सेले सोमबार पनि सोही प्रवृत्ति पछ्याएको हो ।

सो दिन कारोबारमा आएका १३ वटै उपसमूहको परिसूचक बढेपछि समग्र नेप्सेमा दोहोरो अंकको वृद्धि सम्भव भएको हो । तीमध्ये पनि अघिल्ला दिनमा धेरै घटेको जलविद्युत्, अन्य, निर्जीवन बिमा, जीवन बिमा उपसमूहको परिसूचक धेरै अंकले बढेको देखिन्छ ।

अघिल्लो कारोबार दिनको तुलनामा नेप्से ०.९९ प्रतिशतले बढेपछि समग्र नेप्से २ हजार ५ सय ८५.०४ अंकमा उक्लेर बन्द भएको छ ।

सो दिन कारोबारमा आएकामध्ये २२६ कम्पनीको सेयर मूल्य बढ्दा ४७ वटाको घटे र २ वटा समूहको सेयर मूल्य स्थिर छ । नेप्से दोहोरो अंकले बढ्दा पनि २२६ वटा कम्पनीका सेयरधनीको सम्पत्तिको मूल्य बढेको छ । ती कम्पनीको सेयर मूल्य बढेकाले सेयरधनीको सम्पत्तिको मूल्य बढेको रूपमा विश्लेषण गरिएको हो ।

शुक्रबार धेरै सेयर मूल्य बढ्ने मुख्य पाँच कम्पनीमा इन्फिनिटी लघुवित्त, त्रिशुली जलविद्युत, सृजनशील लघुवित्त, सर्वोत्तम पेन्ट्स र मल्टिप्रपोज फाइनान्स छन् । जसअनुसार इन्फिनिटी लघुवित्तको सेयर मूल्य ६.४३, त्रिशूली जलविद्युत् ६.३८, सृजनशील लघुवित्तको ५.९३, सर्वोत्तम पेन्ट्सको ५.४० र मल्टिप्रपोज फाइनान्सको ५.२१ प्रतिशतले बढे ।