काठमाडौँ । नेकपा एमालेमा चार महिनादेखि चलेको पुनर्गठनसम्बन्धी गरमागरम बहस केन्द्रीय कमिटीको तेस्रो पूर्ण बैठकसम्म पुग्दा कमजोर बनेको छ । अध्यक्ष केपी शर्मा ओली झन् कडारुपमा प्रस्तुत भएसँगै एमालेको आन्तरिक परिस्थितिमा एकाएक फेरबदल आएको हो ।
केन्द्रीय कमिटी बैठक सुरु भएलगत्तै पुनर्गठन पक्षधर उपाध्यक्ष विष्णुप्रसाद पौडेल र महासचिव शङ्कर पोखरेल अनपेक्षित नरम देखिए । एमालेमा पुनर्गठन पक्षको नेतृत्व उनीहरुले गर्दै आएका थिए ।
बैठकपूर्व एमालेमा पुनर्गठनको पक्षमा देखिएका नेताहरु आफ्नो पक्षमा खुलेपछि ओली झन् आक्रामक बनेको पुनर्गठन पक्षका एक नेताको भनाइ छ ।
नेतृत्व पुनर्गठनको बहससँगै पदाधिकारी तहमा ओलीविरोधि खेमाको वर्चश्व देखिएको थियो । पौडेल र पोखरेलसँगै उपाध्यक्षहरु पृथ्वी सुब्बा गुरुङ, रघुजी पन्त, गोकर्ण विष्ट, उपमहासचिव योगेश भट्टराई, सचिवहरु यमलाल कँडेल, राजन भट्टराई, छविलाल विश्वकर्मा, खगराज अधिकारी र हिक्मत कार्की खुलेका छन् ।
उपमहासचिवहरु लेखराज भट्ट, रघुवीर महासेठ र सचिव पद्मा अर्याल तत्काल कुनै धारमा खुलेनन् । उनीहरु निर्णायक अवस्थामा भूमिका खेल्नसक्ने नेताका रूपमा हेरिए । ओलीतर्फ उपाध्यक्ष रामबहादुर थापा ‘बादल’, सचिवहरु भानुभक्त ढकाल, शेरधन राई र महेश बस्नेत उभिए । पदाधिकारीमा बलियो हुँदाहुँदै पनि पुनर्गठन पक्षधर केन्द्रीय समितिमा लत्रिनुले कार्यकर्ताहरुलाई अचम्मित बनाएको छ ।
यस विषयमा बुझ्दा पुनर्गठन पक्षधरका एक नेताले अध्यक्ष ओली र उनीपक्षका नेताहरू बहुमतका नाममा जबर्जस्ती गरिए पार्टी फुटाउने तयारीमा लागेको बताए । यही तयारीले गर्दा थुप्रै केन्द्रीय सदस्यको पुनर्गठन आवाज रोकिएको उनको दाबी छ ।
केन्द्रीय कमिटी बैठक बस्नुअघिसम्म अध्यक्ष केपी शर्मा ओली रक्षात्मक नै थिए । उनले आफ्नो पक्षलाई बलियो बनाउन अनेकौं हत्कण्डा अपनाए । यसैको फलस्वरुप संख्यात्मक सन्तुलनले ओलीलाई क्रमशः बलियो बनाएको हो ।
अध्यक्षले आफैं बैठक चलाउँदा महासचिव र उनीपक्षका नेताहरूले प्रतिवाद नगर्नुले पनि केन्द्रीय सदस्य तहमा ओलीप्रतिको त्रासले मनोबैज्ञानिक रूप लिएको ती केन्द्रीय सदस्यको भनाइ छ ।
‘कि पार्टी छाडेर जानुपर्यो, पार्टीमै बस्ने भए भ्यागुतोले पहरा फुटाउन सम्भव भएन,’ उनले भने । त्यसमाथि पुनर्गठन पक्षका मुख्य नेताहरू नै रक्षात्मक हुँदा केन्द्रीय सदस्य तहका नेताको मनोबल गिरेको उनी बताउँछन् ।
यद्यपि यी सबै परिघटना जनताको तहमा घातक र सकसपूर्ण हुनेमा नेताहरू विश्वस्त छन् । ‘अब पार्टी सकिन्छ भन्ने जान्दाजान्दै पनि अध्यक्षले नै पार्टी फुटाउने भनेपछि पुनर्गठन पक्षमा उभिन सकिएन, त्यसमाथि पुनर्गठन पक्षका नेताहरू नै गल्नु भयो, हामी बेहुलोबिनाका जन्ती भयौं’, उनले भने । उनका अनुसार पार्टी फुट्नुभन्दा नेतृत्वको अन्याय सहन सजिलो हुने ठहरपछि एमालेमा यस्तो परिस्थिति विकास भएको हो ।