काठमाडौं, चैत २६ (२०८२) ।
पाकिस्तानको इस्लामाबादमा सम्पन्न ‘ब्याडमिन्टन एसिया–साउथ एसिया रिजनल च्याम्पियनसिप २०२६’ मा नेपाली टोलीले ऐतिहासिक सफलता हासिल गरेको छ। नेपालका नम्बर एक ब्याडमिन्टन खेलाडी प्रिन्स दाहालले प्रतियोगितामा उत्कृष्ट प्रदर्शन गर्दै दोहोरो स्वर्ण पदकसहित कुल चार पदक जितेर कीर्तिमान कायम गरेका छन्।
स्वर्ण यात्रा: एकल र मिक्स डबल्समा सफलता
प्रतियोगिताको मुख्य आकर्षण बनेका प्रिन्सले पुरुष एकलतर्फको फाइनलमा आयोजक राष्ट्र पाकिस्तानका खेलाडीलाई निकै रोमाञ्चक सेटमा पराजित गरे। उनले २१–९, १२–२१ र २१–६ को सेटमा जित निकाल्दै स्वर्ण जितेका हुन्। पहिलो र तेस्रो सेटमा पूर्ण नियन्त्रण कायम गरेका प्रिन्सले निर्णायक सेटमा विपक्षीलाई दबाबमा राख्न सफल भए।
त्यस्तै, प्रिन्सले मिक्स डबल्समा रसिला महर्जनसँग जोडी बनाउँदै नेपालको झोला अर्को स्वर्ण पदक थपे। यी दुई खेलाडीबीचको उत्कृष्ट तालमेलले नेपाललाई अन्तर्राष्ट्रिय मञ्चमा पुनः स्थापित गरेको छ।
पदक तालिकामा नेपालको वर्चस्व
नेपाली खेलाडीहरूले स्वर्णका साथै रजत र कांस्य पदकमा पनि प्रभावशाली उपस्थिति जनाएका छन्:
रजत पदक: पुरुष डबल्समा प्रिन्स दाहाल र क्षितिज खनालको जोडीले रजत जिते। साथै, मिक्स टिम इभेन्टमा पनि नेपालले रजत पदक हात पार्यो। मिक्स टिममा प्रिन्स, क्षितिज, रसिला र शेस्ना श्रीपाली सामेल थिए।
कांस्य पदक: महिला एकलतर्फ रसिला महर्जनले कांस्य जितिन् भने महिला डबल्समा रसिला र शेस्ना श्रीपालीको जोडीले अर्को कांस्य पदक सुरक्षित गरे।
नेपाली ब्याडमिन्टन संघमा लामो समयदेखि देखिएको संस्थागत विवाद र कानुनी अन्योलपछि रामजी बहादुर श्रेष्ठको नेतृत्वले आधिकारिकता पाएको थियो। वैधानिकता प्राप्त गरेपछिको यो पहिलो अन्तर्राष्ट्रिय सहभागितामै नेपालले यति ठूलो उपलब्धि हासिल गर्नुलाई खेल वृत्तमा निकै महत्वका साथ हेरिएको छ।
“यो सफलता केवल पदक मात्र होइन, नेपाली ब्याडमिन्टनको नयाँ युगको सुरुवात हो। सही नेतृत्व र स्पष्ट मार्गचित्र हुँदा खेलाडीले कस्तो नतिजा दिन सक्छन् भन्ने यो प्रमाण हो,” अध्यक्ष रामजी श्रेष्ठ बताउँछन्।
खेलाडीहरूको यो सानदार प्रदर्शनले स्पष्ट नेतृत्व, स्थायित्व र खेलाडी केन्द्रित वातावरणको महत्वलाई पुष्टि गरेको छ। दक्षिण एसियाली स्तरमा देखिएको यो शक्तिले नेपाली ब्याडमिन्टनलाई आगामी एसियाली र ओलम्पिक छनोटका लागि समेत उर्जा प्रदान गरेको छ।