काठमाडौँ । राष्ट्रिय सभामा नेकपा एमालेकी सांसद सम्झना देवकोटाले उपभोक्ताले भोगिरहेको खाना पकाउने ग्यास अभाव र वितरणसम्बन्धी समस्या समाधानका लागि सरकारको ध्यानाकर्षण गराएकी छन्।
बुधबारको बैठकमा विशेष समयमा बोल्दै उनले बजारमा विभिन्न कम्पनीका ग्यास उपलब्ध भए पनि उपभोक्ताले सहज रूपमा प्राप्त गर्न नसकेको अवस्था रहेको उल्लेख गरिन्। ग्यास पाइए पनि फरक कम्पनीका सिलिन्डर साट्न असहजता हुने र साट्दा अतिरिक्त शुल्क तिर्नुपर्ने प्रवृत्तिले सर्वसाधारण थप मारमा परेको उनको भनाइ थियो।
देवकोटाले ग्यास कम्पनीहरूबीच समन्वय अभावका कारण उपभोक्ताले अनावश्यक झन्झट व्यहोर्नु परेको उल्लेख गर्दै कुनै अतिरिक्त शुल्क नलिई सिलिन्डर साटासाट गर्न सकिने व्यवस्था गर्न आग्रह गरिन्।
उनले अन्तर्राष्ट्रिय स्तरमा, विशेष गरी मध्यपूर्व क्षेत्रमा जारी द्वन्द्वका कारण पेट्रोलियम पदार्थ र ग्यासको मूल्य वृद्धि भएको उल्लेख गर्दै त्यसको प्रभाव नेपालमा महँगीका रूपमा देखिएको बताइन्। दैनिक उपभोग्य वस्तुको मूल्य बढ्दा न्यून तथा मध्यम आय भएका परिवारको जीवनयापन प्रभावित भएको उनले जनाइन्।
साथै, उक्त क्षेत्रमा रहेका नेपाली नागरिकको सुरक्षाप्रति चिन्ता व्यक्त गर्दै आवश्यक संरक्षणका लागि सरकारलाई सक्रिय हुन आग्रहसमेत गरिन्।