काठमाडौं । श्रमसंस्कृति पार्टीका अध्यक्ष हर्कराज साम्पाङले प्रतिनिधिसभा बैठकमा सरकारको कार्यशैलीमाथि कडा प्रश्न उठाउँदै सीमा सुरक्षा, सुकुम्बासी व्यवस्थापन, अध्यादेश, बजेट निर्माण र तस्करी नियन्त्रणजस्ता विषयमा तीव्र आलोचना गरेका छन्।
सोमबार बसेको प्रतिनिधिसभा बैठकलाई सम्बोधन गर्दै साम्पाङले सरकारले राष्ट्रिय सुरक्षाभन्दा आफ्नै नागरिकमाथि दबाब सिर्जना गर्न राज्य संयन्त्रको प्रयोग गरेको आरोप लगाए। उनले सीमाको रक्षा गर्नुपर्ने निकायलाई सुकुम्बासी हटाउने कार्यमा लगाइएकोप्रति आपत्ति जनाउँदै यस्तो कदम न्यायसंगत हुन नसक्ने बताए।
लिपुलेक क्षेत्रमा भइरहेको गतिविधिप्रति सरकार मौन बसेको भन्दै उनले नेपालको भूभागमा भइरहेका हस्तक्षेपबारे स्पष्ट धारणा सार्वजनिक गर्न सरकारसँग माग गरे। सीमासम्बन्धी संवेदनशील विषयमा सरकारको चुप्पीले राष्ट्रिय स्वाभिमान कमजोर बनाएको उनको टिप्पणी थियो।
सुकुम्बासी समस्या समाधानमा सरकारको दृष्टिकोणप्रति पनि उनले असन्तुष्टि व्यक्त गरे। गरिब तथा विपन्न नागरिकलाई उचित व्यवस्थापन नगरी विस्थापित गरिएको आरोप लगाउँदै उनले प्रभावित नागरिकको अवस्थाबारे सरकार संवेदनशील बन्नुपर्ने बताए।
साम्पाङले संसद् छल्दै अध्यादेश ल्याउने प्रवृत्तिलाई लोकतान्त्रिक मूल्य र विधिको शासनविपरीत भएको उल्लेख गरे। उनले संवैधानिक परिषद्को निर्णय प्रक्रियामाथि समेत प्रश्न उठाउँदै बहुमतको गणनामा पारदर्शिता र संवैधानिक मर्यादा कायम गर्न आग्रह गरे।
विदेशी ऋणको बढ्दो भारप्रति चिन्ता व्यक्त गर्दै उनले ऋणको जिम्मेवारी अन्ततः जनतामाथि पर्ने भन्दै सरकारलाई वित्तीय अनुशासन अपनाउन सुझाव दिए। साथै, बजेट निर्माण प्रक्रियामा सबै राजनीतिक दलसँग परामर्श हुनुपर्ने उल्लेख गर्दै उनले वर्तमान बजेट समावेशी र राष्ट्रिय भावना अनुरूप हुनुपर्ने धारणा राखे।
सीमावर्ती क्षेत्रमा भइरहेको तस्करी नियन्त्रणमा सरकार प्रभावकारी हुन नसकेको आरोप लगाउँदै साम्पाङले कानुन सबैका लागि समान रूपमा लागू हुनुपर्नेमा जोड दिए। उनका भनाइले संसद्मा सरकारको नीति, पारदर्शिता र जवाफदेहिताबारे पुनः बहस सिर्जना गरेको छ।