- प्रधानमन्त्री र मन्त्रीहरूको संसद्मा अनुपस्थितिप्रति कडा आपत्ति — सभामुखबाट रुलिङको माग, सात दिनदेखि पर्चा-पम्प्लेटसहित विरोध जारी
काठमाडौं । श्रम संस्कृति पार्टीका अध्यक्ष एवं सांसद हर्कराज राईले बुधबार बसेको प्रतिनिधिसभा बैठकमा सरकार संसद्प्रति जवाफदेही नभएको कडा आरोप लगाउँदै विरोध जारी रहने चेतावनी दिएका छन्। आगामी आर्थिक वर्षको नीति तथा कार्यक्रममाथिको छलफलमा प्रधानमन्त्री र मन्त्रीहरूको निरन्तर अनुपस्थितिलाई लिएर उनी तीव्र आलोचनामा उत्रिए।
सदन अघि बढेको सातौँ दिनसम्म आफ्नो पार्टीले पर्चा र पम्प्लेटसहित निरन्तर विरोध गरिरहेको उल्लेख गर्दै राईले भने — सरकार जिम्मेवार नबन्दासम्म आन्दोलन रोक्ने प्रश्नै उठ्दैन। संसद्को नियमावली सरकारका हकमा कार्यान्वयन नभएको कडा टिप्पणी गर्दै उनले प्रधानमन्त्रीदेखि मन्त्रीहरूसम्म सबैको उत्पत्ति संसद्बाटै भएकाले सदनप्रति जवाफदेही हुनु नैतिक दायित्व भएको जोड दिए।
सांसद राईले सभामुख डोलप्रसाद अर्यालसमक्ष प्रधानमन्त्री र मन्त्रीहरूलाई संसद्मा अनिवार्य उपस्थित गराउन रुलिङ गर्न स्पष्ट माग राखे। यसअघि सदनमा लगातार विरोध भइरहेपछि सभामुख अर्यालले कारबाहीको चेतावनी दिइसकेका छन्।