काठमाडौँ । अघिल्लो कारोबार दिन उल्लेख्य सुधार देखिएको सेयर बजारमा साताको चौथो कारोबार दिन बिहीबार भने पुनः गिरावट आएको छ । नेपाल स्टक एक्सचेन्ज (नेप्से) परिसूचक १२.३६ अंकले ओरालो लागेर २७४२.११ विन्दुमा बन्द भएको हो ।
परिसूचक घटे पनि बजारमा कारोबार रकम (टर्नओभर) मा भने सुधार देखिएको छ । अघिल्लो कारोबार दिन ३ अर्ब ८२ करोड रुपैयाँ बराबरको सेयर खरिदबिक्री भएकोमा बिहीबार त्यो परिमाण बढेर झन्डै ४ अर्ब रुपैयाँ पुगेको छ ।
यस दिन लगानीकर्ताको आकर्षण कमजोर रहँदा कुनै पनि कम्पनीको सेयर मूल्यमा सकारात्मक सर्किट (१० प्रतिशतको वृद्धि) लाग्न सकेन ।
कारोबार रकमका आधारमा आँखु खोला जलविद्युत कम्पनी शीर्ष स्थानमा रह्यो, जसको १७ करोड रुपैयाँभन्दा बढीको सेयर कारोबार भयो । यस्तै, रिडी पावरको १५ करोड, बुंगल हाइड्रो र एनआरएन इन्फ्रास्ट्रक्चरको १३/१३ करोड तथा फस्ट माइक्रोफाइनान्स लघुवित्तको ११ करोड रुपैयाँ बराबरको सेयर कारोबार भयो ।
घट्दो बजारमा सबैभन्दा बढी नोक्सानी अपर लोहोर खोला हाइड्रोपावरका लगानीकर्ताले ब्यहोरे, जसको सेयर मूल्य १४.९५ अंकले ओरालो लाग्यो ।
बिहीबारको बजारमा म्युचुअल फण्ड उपसमूहबाहेक अरू सबै क्षेत्रगत उपसूचकहरू (सब-इन्डेक्स) राताम्मे देखिएका छन् । बैंकिङ, जलविद्युत, उत्पादन तथा प्रशोधन, र लघुवित्त लगायतका मुख्य उपसूचकहरू नकारात्मक रहँदा समग्र बजारमा दबाब पुगेको हो ।