काठमाडौँ – अर्थमन्त्री डा. स्वर्णिम वाग्लेले देशको इतिहासकै ठूलो वित्तीय अपराधमा संलग्न समूहबाट पालित-पोषित शक्तिले प्रधानमन्त्री र आफूमाथि नियोजित आक्रमण गरिरहेको आरोप लगाएका छन् । बुधबार प्रतिनिधिसभाको अर्थ समितिमा बजेटसम्बन्धी छलफलमा बोल्दै अर्थमन्त्री वाग्लेले सरकारले गरिरहेको ठूला वित्तीय अपराधको अनुसन्धानबाट त्रसित समूहले आफूहरूविरुद्ध घेराबन्दी गरेको दाबी गरेका हुन् ।
“नेपाली इतिहासकै ठूलो वित्तीय अपराधमा संलग्नमाथि सरकारले छानबिन गरिरहेको छ, केही दिनमा यो विषय अदालत पुग्दैछ,” मन्त्री वाग्लेले भने, “हामीसँग रुष्ट तिनै समूहबाट पालित-पोषित तत्वले प्रधानमन्त्री र ममाथि आक्रमण गरिरहेका छन् ।” उनले राष्ट्रिय स्वतन्त्र पार्टी (रास्वपा) को बहुमत र सरकारको सुशासनको अभियान धेरैलाई नपचेकाले यस्तो खेल भइरहेको टिप्पणी गरे ।
सार्वभौम संसद्का सदस्यलाई समेत त्यस्ता समूहको कुराबाट प्रभावित नहुन र लहलहैमा लागेर संसद्को गरिमा कमजोर नबनाउन उनले आग्रह गरेका छन् । “चियाको कपमा तुफान ल्याउन खोजिएको छ, यसलाई म डटेर सामना गर्न तयार छु,” उनले भनेका छन् ।
बजेट वक्तव्यका १६ पाना गायब पारिएको भन्ने मिडिया रिपोर्ट र विपक्षीको आरोपको खण्डन गर्दै अर्थमन्त्री वाग्लेले ४६० पानाको डकुमेन्टमा एउटा पूर्णविराम वा थोप्लो पनि यताउता नपारिएको स्पष्ट पारेका छन् । आम जनतालाई केही समय भ्रममा पार्न यस्तो अफवाह फैलाइएको उनको भनाइ छ ।
गाडी आयात गडबडीबारे स्पष्टीकरण
रसुवा र कोरला (मुस्ताङ) नाकाबाट भएका गाडी आयातमा करको हेरफेर भएको भन्ने विवादबारे बोल्दै अर्थमन्त्रीले गडबढीको शंका लागेर अर्थ मन्त्रालय, भन्सार र सशस्त्र प्रहरीको टोली आफैँले रसुवा पठाएर छानबिन थालेको जानकारी दिए ।
“जे आरोप लगाइएको छ, वास्तविकता त्यसको ठिक उल्टो छ । कर घटेको छ, व्यापारीहरू फसेका छन्,” उनले भने, “हतार-हतार जाँचपास गर्ने व्यापारी मारमा परेका छन्, बरु राज्यलाई नाफा भएको छ ।” उनले चीनको प्रतिष्ठित ब्रान्ड ‘बीवाईडी’ लाई बदनाम गराउन चलखेल भइरहेको आशंका समेत व्यक्त गरेका छन्।
सांसदले तथ्य र प्रमाणका आधारमा मात्र बोल्नुपर्ने उल्लेख गर्दै मन्त्री वाग्लेले भने, “एक-दुई वटा पत्रिकाले उछालेको भरमा र पत्रिकाको पछाडि दौडिएर माननीयज्यूहरूले आफ्नो ओज घटाउनु हुँदैन । सेतो लुगामा हिलो छ्याप्ने यो प्रयास प्रथम दृष्टिमै गलत छ ।”