काठमाडौँ– फिफा विश्वकप फुटबलमा नर्वेले लगातार दोस्रो जित निकाल्दै नकआउट चरणमा स्थान सुरक्षित गरेको छ। न्युजर्सीस्थित रंगशालामा आज बिहान सम्पन्न खेलमा नर्वेले सेनेगललाई ३–२ गोलले पराजित गर्दै अन्तिम ३२ मा प्रवेश गरेको हो।
नर्वेको जितमा मार्कस पेडरसनले एक तथा एर्लिङ हालान्डले दुई गोल गरे। सेनेगलका इस्माइला सारले दुई गोल फर्काए पनि टोलीलाई हारबाट जोगाउन सकेनन्।
खेलको ४३औँ मिनेटमा पेडरसनले गोल गर्दै नर्वेलाई अग्रता दिलाएका थिए। त्यसपछि ४८औँ मिनेटमा हालान्डले गोल थप्दै टोलीको अग्रता दोब्बर बनाए। सेनेगलले ५३औँ मिनेटमा सारको गोलमार्फत खेलमा फर्कने संकेत दिएको थियो।
तर, ५८औँ मिनेटमा हालान्डले व्यक्तिगत दोस्रो गोल गर्दै नर्वेलाई ३–१ को सहज अवस्थामा पुर्याए। खेलको इन्जुरी समयमा सारले अर्को गोल गरे पनि सेनेगल हार टार्न असफल रह्यो।
यस नतिजासँगै समूह ‘आई’ मा नर्वे ६ अंकसहित शीर्षस्थानमा उक्लिएको छ र नकआउट चरणमा पुगेको छ। लगातार दोस्रो हार बेहोरेको सेनेगल भने समूह चरणबाटै बाहिरिएको छ।