काठमाडौँ । रिक्त सचिव पदमा बढुवाका लागि तीन वरिष्ठ सहसचिवको नाम सिफारिस भएको छ। सचिव बढुवा सिफारिस समितिको शुक्रबार बसेको बैठकले नेपाल प्रशासन सेवातर्फ रिक्त सचिव पदका लागि कालीप्रसाद पराजुली, रुद्रसिंह तामाङ र आभा श्रेष्ठलाई योग्यताक्रम अनुसार क्रमशः पहिलो, दोस्रो र तेस्रो नम्बरमा सिफारिस गरेको हो।
सिफारिस भएकामध्ये पराजुली हाल राष्ट्रिय महिला आयोगमा कार्यरत छन्। तामाङ ऊर्जा, जलस्रोत तथा सिँचाइ मन्त्रालयमा कार्यरत छन् भने श्रेष्ठ मधेश प्रदेशमा सचिवका रूपमा कार्यरत छिन्।
निजामती सेवा ऐनअनुसार कार्यसम्पादन मूल्याङ्कनका आधारमा हुने बढुवाका लागि रिक्त एक सचिव पदमा बढुवा समितिले तीन जना सहसचिवको नाम सिफारिस गर्ने व्यवस्था छ। समितिको सिफारिसपछि तीनमध्ये एक जनालाई सचिवमा बढुवा गर्ने निर्णय मन्त्रिपरिषद्ले गर्नेछ।
यसपटकको सिफारिसमा पराजुली पहिलो नम्बरमा छन्। पछिल्लो समय सचिव बढुवामा सिफारिसको योग्यताक्रमलाई प्राथमिकता दिइँदै आएको सन्दर्भमा अब मन्त्रिपरिषद्ले कसलाई सचिवमा बढुवा गर्छ भन्ने विषय प्रशासनिक वृत्तको चासोमा छ।
सचिव बढुवाको श्रृंखलामा पराजुली र तामाङ अगाडि
पछिल्लो समय सचिव पद रिक्त हुँदै गएसँगै बढुवा सिफारिसको प्रक्रिया पनि लगातार अघि बढिरहेको छ। यसअघि रिक्त सचिव पदका लागि उत्तमकुमार खत्री, कालीप्रसाद पराजुली र रुद्रसिंह तामाङ क्रमशः पहिलो, दोस्रो र तेस्रो नम्बरमा सिफारिस भएका थिए।
यसपटक अघिल्लो सिफारिसमा दोस्रो नम्बरमा रहेका पराजुली पहिलो र तेस्रो नम्बरमा रहेका तामाङ दोस्रो स्थानमा उक्लिएका छन्। श्रेष्ठ तेस्रो नम्बरमा सिफारिस भएकी छन्।