काठमाडौँ- संयुक्त राष्ट्रसंघले बिहीबार अफगानिस्तानमा भएका हवाई आक्रमणबाट कम्तीमा १० नागरिकको मृत्यु भएको बताएको छ। मृत्यु भएकामध्ये अधिकांश बच्चा थिए। पाकिस्तानले उक्त आक्रमणमा उग्रवादीहरूलाई लक्ष्य बनाएको दाबी गरेको छ।
अफगानिस्तान र पाकिस्तानबीच यस वर्षको सुरुमा युद्ध भएको थियो तर पछिल्ला केही महिनामा तनाव कम भएको देखिएको थियो।
सुरक्षा मुद्दाहरूमा स्थायी समाधान नभएपछि मार्चको युद्धविरामपछि छिटपुट आक्रमणहरू भइरहेका छन्।
संयुक्त राष्ट्रसंघको अफगानिस्तान मिशन (यूएनएएमए) का अनुसार नवीनतम आक्रमणहरू हेलमन्द प्रान्त र पाकिस्तानसँग जोडिएको कुन्नर प्रान्तमा भएका थिए।
‘आक्रमणमा कम्तीमा १० नागरिकको मृत्यु भएको छ, जसमध्ये अधिकांश बच्चा हुन् र नौ जना घाइते भएका छन्,’ यूएनएएमएले वक्तव्यमा भनेको छ।
इस्लामाबादले अफगानिस्तानमा ‘योजनाबद्ध र सन्तुलित’ आक्रमण गरेको पुष्टि गरेको छ तर स्थानहरूको विस्तृत विवरण दिएको छैन। उसले आक्रमण उग्रवादीहरूलाई लक्षित भएको दाबी गरेको छ।
हेलमन्दका दुई बासिन्दाले एएफपीलाई तीनवटा हवाई आक्रमण आफ्नो गाउँमा परेको बताए।
पाकिस्तानको सूचना मन्त्रालयले भन्यो, ‘अफगानिस्तानका दुई स्थानमा ‘विश्वसनीय खुफिया जानकारीका आधारमा आतंकवादी शिविर र लुकेका ठाउँहरूलाई चयन गरी’ आक्रमण गरिएको हो।
छिमेकी कान्दाहार प्रान्तसँगै दक्षिणी अफगानिस्तानको हेलमन्द तालिबान आन्दोलनका लागि चर्चित छ। गत हप्ता कान्दाहारमा पनि हवाई आक्रमण भएको थियो।
हेलमन्दको प्रान्तीय राजधानी लस्करगाहको इटालियाली एनजीओ इमर्जेन्सीद्वारा सञ्चालित अस्पतालमा दुई बच्चा भर्ना भएको संस्थाको एएफपीलाई बतायो।
पाकिस्तानको सूचना मन्त्रालयले सुरुमा २२ ‘उग्रवादी’ को मृत्यु र हतियार तथा गोलाबारूद नष्ट भएको जनाएको थियो।
इस्लामाबादले अफगानिस्तानमा उग्रवादीहरूलाई आश्रय दिएको आरोप लगाउँछ र ती उग्रवादीहरूले पाकिस्तानमा बारम्बार बम र गोली आक्रमण गर्छन् भन्ने उसको बुझाइ रहेको छ। त्यहाँ हुने द्वन्द्वमा नागरिक र सुरक्षाकर्मी दुवैको मृत्यु हुने गर्छ।
तालिबान सरकारले यसलाई अस्वीकार गर्छ र पाकिस्तानले अफगानिस्तानको सार्वभौमिकता उल्लंघन गरी नागरिक मार्ने गरेको आरोप लगाउने गरेको छ।
अक्टोबरदेखि दुई देशबीचको हिंसामा ५०० भन्दा बढी नागरिकको मृत्यु भएको संयुक्त राष्ट्रसंघको अफगानिस्तान नियोगले जानकारी गराएको छ।