काठमाडौं — नवनियुक्त प्रधानन्यायाधीश डा. मनोकुमार शर्माले पद तथा गोपनीयताको शपथ ग्रहण गरेका छन्। मंगलबार संघीय संसद्को संसदीय सुनुवाइ समितिबाट अनुमोदन भएपछि उनलाई राष्ट्रपति रामचन्द्र पौडेलले शपथ दिलाएका हुन्।
संवैधानिक परिषद्बाट प्रधानन्यायाधीशमा सिफारिस भएका शर्माको संसदीय सुनुवाइ प्रक्रिया मंगलबार सम्पन्न भएको थियो। सुनुवाइ समितिले उनको नाम सर्वसम्मत रूपमा अनुमोदन गरेसँगै उनी औपचारिक रूपमा नेपालको नयाँ प्रधानन्यायाधीश बनेका हुन्।
शर्माले संसदीय सुनुवाइ समितिमा उपस्थित भएर आफूविरुद्ध परेका १६ वटा उजुरीबारे स्पष्टीकरण दिएका थिए। समितिले उजुरीकर्तासँग छलफल गरेपछि शर्मासँग प्रश्नोत्तर गरेको थियो। सबै प्रश्नको जवाफ दिएपछि उनको नियुक्तिको बाटो खुलेको हो।
नयाँ प्रधानन्यायाधीश शर्माले बुधबारदेखि सर्वोच्च अदालतको दैनिक इजलास सञ्चालन तथा पेशी तोक्ने जिम्मेवारी सम्हाल्नेछन्।
उनको नियुक्तिसँगै सर्वोच्च अदालतको नेतृत्वमा नयाँ अध्याय सुरु भएको छ। न्यायपालिकाको स्वतन्त्रता, निष्पक्षता र न्याय सम्पादनको प्रभावकारितामा उनले कस्तो भूमिका खेल्नेछन् भन्ने विषयमा अहिले सबैको चासो केन्द्रित भएको छ।